Denmark: Way qiimo jaban tahay, in dhakhtarnimo laga barto Ukraine. Laakiin waxbarashada shaki wayn ayaa ku gedaaman, sidaas awgeed waa in isha lagu hayo dhakhtarrada wax ka soo bartay Ukraine, ayuu yidhi wasiirka caafimaadka Bertel Haarder.

Sida uu sheegay warkii 21 Søndag, ilaa 30 dhakhtar oo Ukraine wax ku soo bartay ayaa Danmark jooga.

Tayada waxbarashada aad baa looga shakisan yahay, sidaas awgeed dalal ay Malaysia ka mid tahay ayaa ka fiirsada, wasiirka caafimaadka Bertel Haarder-na wuxu yidhi, waa dabiici in jaamacadaha Ukraine lagu daro liiska laga fiirsanayo.

Waa inay mushahar la'aan shaqeeyaan
- Haddii qofka ay ka maqan tahay waxbarashada akhrisku (teoretisk uddannelse), waa inuu waxa ka maqan jeebkiisa ka bixiyaa. Haddii ay ka maqan tahay waxbarashada baraktigguna (praktisk uddannelse), sidoo kale waa inuu bilaash kaga shaqeeyaa kilinigga ilaa intu soo gaadhayo heerka dhakhtarka deenishka ah, ayuu DR Nyheder ku yidhi Bertel Haarder.

Wuxu hoosta ka xarriiqay, inuu qofku dhammaystiro qaybta waxbarashada ee baraktigga ah oo dabadeed imtixaan galo, ka hor inta aan loo oggolaan, inuu baadho dadka bukaanka ah ee deenishka.

Bertel Haarder wuxu maanta la kulmayaa agaasinka caafimaadka, si loo adkeeyo xeerarka la xidhiidha dhakhtarrada , wax ku soo bartay dalalka debedda.

Waxa qortay: Pia Dramshøj
Waxa tarjumay: Ahmed Diria Liban