Hargeysa(RH)Ciidanka Dab-demiska Caasimada Hargeysa ayaa Habeenimadii xalay Abaaro 11:00 PM gurmad dab loogu yeedhay Dab ka dhacay Xaafada Shacabka, dabkaas oo noociisu ahaa shoolad Qaraxday.
Shooladan ayaa waxyeelo badan soo gaadhsiisay Gabadh halka saddex kale oo ka mida dadkii gurigaas ku noolaa iyadana ay waxyeelo soo gaadhsiisay , kuwaasi oo isku dayay inay badbaadiyaan gabadhaas.
Ciidanka Dab-demiska ayaa Gabadhaas iyo dhaawacii kaleba gaadhsiiyay Cisbitaalka weyn ee Magaalada Hargeysa, waxaana ilaa hadda mid ka mida Affartaa Qof ee Dhaawaca ah Lagu dabiibayaa Cisbitaalka Hargeysa.
Hogaanka Caafimaadka Ciidanka Dab-demiska Qaranka oo Hawlgalkaa Hogaaminayay ayaa Xafiiskiisa Warbaahinta uga warramay xaalada Dhaawaca, ayaa wuxuu xaqiijiyay in ciidanku kaalin weyn ka geystay badbaadada affartaa qof, waxaa kaloo tilmaamay hogaanku in dhibaatada shooladaha Qarxaya ay ku soo badanayaan magaalada Hargeysa.
Mudooyinkii u dambeeyay waxaa ku soo badanayay dhaawaca ay gaysanayaan shooladaha, waxaana taasi keenaysa isticmaalka shooladahaas oo dadweynuhu inta badan aanay aqoon badan u lahayn.