KOLDING (Radio Hormuud): Maalinta Isniinta ah ee ay taariikhdu ku beegan tahay 23-ka Maarso, waxaa si rasmi ah loo furayaa saldhigga cusub ee gurmadka deg-degga ah ee magaalada Kolding, kaas oo laga dhisay aagga Kobbervej.
Dhismahan weyn oo casri ah ayaa beddelaya saldhiggii hore ee ku yaallay dekedda (Havn), kaas oo muddo dheer ahaa xarunta ugu weyn ee ciidanka dab-demiska TrekantBrand.
Maalgelin weyn iyo Caqabadihii dhismaha
Saldhiggan cusub, oo ay naqshadaysay shirkadda maxalliga ah ee Mejeriet, ayaa dhismihiisa lagu qarash gareeyey lacag dhan 60 milyan oo karoon. Qiimaha dhismaha ayaa sare u kacay ku dhowaad 13 milyan marka loo eego qiyaastii hore ee ahayd 47.3 milyan, waxaana sababta loo aaneeyey kor u kaca qiimaha agabka dhismaha iyo shaqooyin dheeraad ah oo laga qabtay dhulka uu dhismaha ku fadhiyo.
Maxaa isbeddelaya oo ay dadka reer Kolding ka faa'iidayaan?
U guurista saldhiggan cusub ma ahan mid bilic kaliya ku kooban, balse waa mid istiraatiijiyad ah:
-
Gurmad Deg-deg ah: Saldhigga wuxuu ku yaallaa meel aad ugu dhow jidka weyn ee motor-way-ga, taas oo u sahlaysa gawaarida dab-demiska inay si degdeg ah u gaaraan dhammaan qaybaha magaalada iyo nawaaxigeeda.
-
Amniga Shacabka: Maadaama uu saldhiggu casri yahay, wuxuu kor u qaadayaa tayada gurmadka ee dhibaatooyinka dabka iyo shilalka.
Bilowga Shaqada
Sida qorshuhu yahay, Isniinta barqadii qiyaastii 10:00 AM, ayaa la filayaa inay dhacdo udrykning-tii (gurmadkii) ugu horreeyay ee ka soo baxa xarunta cusub.
Magaalada Kolding waxay hadda u muuqataa mid heshay difaac iyo badbaado ka xoog badan sidii hore, iyadoo laga guurayo dhismayaashii hore ee dekedda loona guurayo xarun u qalanta baahida maanta ee magaalada.
Radio Hormuud Kolding - Mar walba kala soco wararka ugu dambeeyay ee magaalada iyo guud ahaan gobalka.