RH: Kiiska racfaanka ee ka dhanka ah Hussein Zake Mohamad, oo sannadkii hore 'lagu'">lagu xukumay 12 sano oo xabsi ah ka dib markii lagu helay dilka aabbe 35 jir ah oo ka dhacay warshadda xoolaha lagu qalo ee Danish Crown ee Holsted, ayaa maanta ka bilowday Maxkamadda Racfaanka ee Vestre Landsret ee magaalada Esbjerg.
xigasho.jv. tarjumaad : Mohamed-Amiin
ESBJERG: Subaxnimadii Isniinta saacaddu markay ahayd 11:00 oo sax ah ayaa maxkamadeynta Hussein Zake Mohamad ay ka bilaabatay Maxkamadda Racfaanka ee Vestre Landsret ee Esbjerg. Eedeysanaha ayaa bishii Sebtember ee sannadkii hore ay maxkamadda hoose ku xukuntay 12 sano oo xabsi ah ka dib markii lagu helay dilka aabbe 35 jir ah oo qoys lahaa – dhacdo naxdin leh oo dhacday 20-kii Juun 2024 wax yar ka hor duhurkii ee warshadda xoolaha lagu qalo ee Danish Crown ee Holsted.
Hussein Zake Mohamad ayaa racfaan ka qaatay 'xukunkaas'.">xukunkaas isagoo dalbanaya in gabi ahaanba eedda laga bari-yeelo. Haddii maxkamadda racfaanku ay dambi ku hesho, garsoorayaasha iyo xeerbeegtida ayaa markaas ka dib qiimeyn doona haddii xukunkii maxkamadda hoose ee 12-ka sano ee xabsiga ah uu yahay ciqaabta saxda ah.
Dib-u-dhac iyo kacsanaan ka hor intaan la bilaabin
Maxkamadeynta ayaa qorshuhu ahaa inay bilaabato 11:00 oo sax ah, laakiin markii hore xoogaa waa dib loo dhigay, maadaama eedeysanaha iyo qareenkiisu ay u baahdeen waqti dheeri ah si ay u wada tashadaan.
Waxyar ka hor 11:20, Hussein Zake Mohamad ayaa ka soo baxay qolkii uu kula tashanayay qareenkiisa, isagoo ay hareeraha ka joogaan laba askari oo boolis ah. Daqiiqado ka dib wuxuu soo galay qolka maxkamadda isagoo ay weheliyaan qareenkiisa, turjumaan, iyo dhowr qof oo u soo daawasho tagay.
Ka hor intaan kiisku si rasmi ah u bilaaban, xaaska eedeysanaha ayaa laga saaray qolka maxkamadda. Maadaama ay mar dambe bixin doonto marag-fur, looma oggola inay goobjoog ka ato maxkamadeynta ka hor intaan la dhageysan marag-furkeeda.
Jidwalka maxkamadeynta
Waqti ku filan ayaa loo qoondeeyay in lagu dhageysto kiiska racfaanka ee maxkamadda sare. Xeer-ilaaliyaha gaarka ah Anemarie Haahr ayaa rajaynaysa in xukunku soo baxo maalinta Khamiista, laakiin difaaca iyo xeer-ilaalinta ayaa si kasta ha ahaatee loo qoondeeyay afar maalmood oo dheeri ah toddobaadka dambe, haddii ay dhacaan dib-u-dhacyo aan la filayn.
Toddobaadka ayaa la filayaa inuu u dhaco sidatan:
-
Isniinta (maanta): Xeer-ilaaliyaha gaarka ah Anemarie Haahr ayaa soo bandhigi doonta kiiska waxayna akhriyi doontaa qaybo ka mid ah xukunkii maxkamadda hoose iyo dukumiintiyada muhiimka ah ee kiiska. Intaa ka dib, Hussein Zake Mohamad wuxuu heli doonaa fursad uu ku bixiyo sharraxaad haddii uu rabo.
-
Talaadada: Maxkamaddu waxay dhageysan doontaa marag-furka tiro maragyo ah oo loo yeeray.
-
Arbacada: Maalinta waxaa lagu bilaabi doonaa su'aalo weydiinta hal marag ah. Intaa ka dib, xeer-ilaaliyaha iyo difaaca ayaa soo jeedin doona dood-xirka dacwadda, ka dibna maxkamaddu waa inay go'aan ka gaartaa dambiga lagu eedeyneynayo.
-
Khamiista: Waxaa la filayaa inuu soo baxo xukunka ugu dambeeya ee kiiska.