RH: Jarmalku wuxuu dhaqan-geliyay sharciyo cusub oo fududeynaya mastaafurinta soo galootiga sharciga loo diido, siyaasaddaas oo looga gol leeyahay in lagu yareeyo caqabadaha hore u jiray ee la xiriira mastaafurinta.
Baarlamaanka Jarmalka ayaa ansixiyay sharciyadan, kuwaas oo oggolaanaya baaritaannada guryaha si loo helo dukumentiyo muujin kara aqoonsiga qofka, sharcigan ayaa meesha ka saaraya waajibaadka ah in la siiyo ogeysiis hore mastaafurinta qaar ka mid ah kiisaska, kordhinaya muddada xabsiga ka hor mastaafurinta laga bilaabo 10 maalmood ilaa 28 maalmood, sharcigan ayaa lagu bartilmaameedsanyaa dadka ku jira ururada dambiilayaasha si loo fududeeyo mastaafurintooda.
Intaa waxaa dheer, Jarmalka wuxuu doonayaa inuu ka dhigo siyaasaddiisa socdaalka mid aan soo jiidasho u lahayn magangalyo-doonka laga bilaabo sannadkan 2024ka isaga oo mar kale diiradda saaraya fududeynta socdaalka shaqaalaha xirfadlayaasha ah.
Tani waxaa ka mid ah joojinta ogeysiiska hore ee mastaafurinta iyo kordhinta muddada xirnaanshaha magangalyo ilaa 28 maalmood. Booliisku waxay sidoo kale heli doonaan awood dheeri ah oo ay ku baari karaan kuwa lagu amray inay dalka ka baxaan iyo inay galaan hantidooda, sida taleefoonada. Waxaa sidoo kale jira wada-hadallo la xiriira heshiisyo lala galo waddamo ay ka mid yihiin Georgia, Moldova, Kenya, Colombia, Uzbekistan, iyo Kyrgyzstan, inkasta oo arrimahan aysan saameyn ku yeelan doonin inta badan magangalyo-doonka ka yimaada Suuriya, Afgaanistaan, iyo Turkiga.
Dowladda jarmalka ayaa sidoo kale doonaysa inay dardar-geliso habka codsiyada magangalyada, iyadoo rajeynaysa in waqtiga loo baahan yahay si loo dhammeystiro codsiyada laga dhigo inta u dhaxaysa saddex ilaa lix bilood.
Sharcigan cusub iyo siyaasadaha la xiriira waxay muujinayaan isku dayga Jarmalka ee uu ku doonayo inuu ku maareeyo arrimaha socdaalka, isagoo isku dheelitiraya adkeynta shuruudaha magangalyo-doonka iyo fududeynta socdaalka shaqaalaha xirfadlayaasha ah si loo xalliyo caqabadaha dhaqaale iyo bulsho ee uu dalku wajahayo.